Ажиллах хүчний шилжилт хөдөлгөөний тухай хуулийн зорилт нь Монгол Улсын иргэн гадаадад, гадаадын иргэн, харьяалалгүй хүн Монгол Улсад хөдөлмөр эрхлэх, тэдгээрийн эрх, хууль ёсны ашиг сонирхлыг хамгаалахтай холбогдсон харилцааг зохицуулахад оршино.

Ажиллах хүчний шилжилт хөдөлгөөний боломжит гурван үйл ажиллагаанд цахим систем нэвтрүүллээ

Хөдөлмөр, нийгмийн хамгааллын яамнаас Ажиллах хүчний шилжилт хөдөлгөөний хууль эрх зүйн орчныг шинэчлэх, төрийн байгууллагуудын цахим үйлчилгээний уялдаа холбоог сайжруулах зорилтын хүрээнд Монгол Улсын иргэдийг гадаадад хөдөлмөр эрхлэхэд зуучлах, гадаадаас нарийн мэргэжлийн ажиллах хүч, мэргэжилтэн авах үйлчилгээ цахим хэлбэрт шилжлээ.

1. Монгол Улсын иргэдийг гадаадад хөдөлмөр эрхлэхэд зуучлах тусгай зөвшөөрлийн үйл ажиллагааны дараах үйлчилгээг авах боломжтой.

Үүнд:

• Тусгай зөвшөөрөлтэй аж ахуйн нэгж, байгууллага, зуучлуулагчийн бүртгэл, үйл ажиллагааны тайлангаа цахимаар ирүүлэх;

• Зуучлуулагчид тодорхойлт авах;

• Тусгай зөвшөөрлийн хүсэлтийг цахимаар илгээх;

• Мэдээллийг цахим системээр дамжуулан шуурхай авах;

• Зуучлуулагч санал, хүсэлтээ илгээх, тусгай зөвшөөрөлтэй байгууллагын талаарх мэдээллийг авах;

2. Гадаадаас ажиллах хүч, мэргэжилтэн авахад зөвшөөрөл олгох үйл ажиллагааны дараах үйлчилгээг авах боломжтой.

Үүнд:

• Урьдчилсан зөвшөөрөл авах;

• Зөвшөөрөл авах үйлчилгээ;

• Сунгалт хийлгэх үйлчилгээ;

• Хөдөлмөр эрхлэлтийг дуусгавар болгох үйлчилгээ;

3. Бүгд Найрамдах Солонгос Улсад хөдөлмөрийн гэрээгээр ажиллах хүсэлтэй иргэдийг цахимаар бүртгэх үйл ажиллагааны дараах үйлчилгээг авах боломжтой.

Үүнд:

• Тусгай шалгалтад бүртгүүлэх;

• Энгийн шалгалтад бүртгүүлэх;

Цахим систем нэвтрүүлсний давуу талууд:

o Ажиллах хүчний шилжилт хөдөлгөөний нэгдсэн мэдээллийн сан бүрдэнэ.

o Төрийн байгууллага хоорондын мэдээллийн урсгал сайжирна.

o Цахим үйлчилгээний соёлыг нэвтрүүлнэ.

o Эдийн засгийн үр ашиггүй зардлыг бууруулж, хэмнэлт бий болгоно. /цаасны хэрэглээ, харилцах цаг хугацаа, дугаарлан зогсох гэх мэт/

o Мэдээллийг хүссэн газраасаа дижитал төхөөрөмж ашиглан шуурхай авах боломж нээгдэнэ. /Ухаалаг гар утас, IPAD, таблет, бусад төхөөрөмж/

o Санал хүсэлтийг цахимаар ирүүлснээр асуудал шийдвэрлэх явц аль шатанд явагдаж буйг хянах боломжтой.